पुणे शहर काँग्रेसमध्ये अंतर्गत वाद, कसबा मतदारसंघात रविंद्र धंगेकरांच्या उमेदवारीला विरोध?

विधानसभा निवडणुका जवळ येत असताना महाविकास आघाडीत जागावाटपावरून तणाव वाढत आहे. अशातच पुणे शहर काँग्रेसमध्ये अंतर्गत वाद उफाळून आल्याने पक्षात अस्वस्थता वाढली आहे. कसबा पेठ मतदारसंघातील विद्यमान आमदार रविंद्र धंगेकर यांच्या उमेदवारीवरून वाद उभा राहिला आहे. काँग्रेसच्या पुणे शहर अध्यक्ष अरविंद शिंदे यांनी अप्रत्यक्षपणे धंगेकरांच्या उमेदवारीला विरोध दर्शवला आहे.

पुण्यातील कसबा पेठ मतदारसंघाचे विद्यमान आमदार रविंद्र धंगेकर यांना आगामी विधानसभा निवडणुकीत पुन्हा उमेदवारी मिळणार का, हा प्रश्न सध्या चर्चेचा विषय ठरला आहे. काँग्रेस शहराध्यक्ष अरविंद शिंदे यांनी टीव्ही 9 मराठीला दिलेल्या मुलाखतीत अप्रत्यक्षपणे धंगेकरांच्या उमेदवारीवर आक्षेप घेतला आहे. शिंदे यांनी स्पष्टपणे सांगितलं की, "जे उमेदवार पक्षाचे नेते राहुल गांधी, सोनिया गांधी आणि मल्लिकार्जून खर्गे यांचे फोटो बॅनर्सवर लावत नाहीत, अशा व्यक्तींना उमेदवारी देऊ नका. व्यक्तिगत राजकारण करणाऱ्यांना पक्षात संधी मिळू नये."

अरविंद शिंदे यांनी रविंद्र धंगेकरांचं नाव थेट घेतलं नसून, त्यांच्या वक्तव्याचा रोख धंगेकरांकडे असल्याचं स्पष्टपणे जाणवत आहे. शिंदे यांनी यापूर्वीही काही नेत्यांच्या गैरहजेरीवरून आपली नाराजी व्यक्त केली होती. "शहरातील काही काँग्रेस नेते आणि पदाधिकारी पक्षाच्या बैठका किंवा आंदोलनांमध्ये ५० टक्के उपस्थितही राहत नाहीत, अशा उमेदवारांबद्दल पक्षाने विचार करावा," असं शिंदे म्हणाले.

शहरातील इतर मतदारसंघांबाबतही अरविंद शिंदेंनी आपलं मत मांडलं. हडपसर आणि पर्वती मतदारसंघ हे पूर्वी काँग्रेसच्या ताब्यात होते आणि तिथं पक्ष पुन्हा विजय मिळवू शकतो, असा त्यांचा दावा आहे. सध्या या दोन मतदारसंघांवर काँग्रेसची ताकद आहे आणि या जागांसाठी सक्षम उमेदवारांची मागणी शिंदेंनी केली आहे. विशेष म्हणजे, मित्र पक्षांकडे या मतदारसंघांसाठी योग्य उमेदवार नसल्याचंही त्यांनी सूचित केलं.

महाविकास आघाडीमध्ये आधीच जागावाटपावरून वाद सुरु असताना काँग्रेसमधील अंतर्गत वाद समोर येणं पक्षासाठी धोक्याचं ठरू शकतं. शहरातील पाच मतदारसंघ काँग्रेसला हवेत, अशी शिंदेंनी मागणी केली आहे. पण जागावाटपाच्या निर्णयावर महाविकास आघाडीत अजूनही स्पष्टता नसल्याने काँग्रेसला याचा फटका बसण्याची शक्यता आहे.

या अंतर्गत वादामुळे पुणे शहरातील काँग्रेसची स्थिती ढासळू शकते. विधानसभेच्या निवडणुकीत महाविकास आघाडीला एकत्र राहणं आवश्यक असताना काँग्रेसमधील या वादामुळे आघाडीला एकत्र ठेवणं आव्हानात्मक ठरणार आहे.