श्रीमंत भाऊसाहेब रंगारी गणपती मंदिरात त्रिपुरारी पौर्णिमेनिमित्त दीपोत्सव व तुळशी विवाह संपन्न

पुणे: हिंदुस्थानातील पहिला सार्वजनिक गणपती असलेल्या श्रीमंत भाऊसाहेब रंगारी गणपती मंदिरात त्रिपुरारी पौर्णिमेनिमित्त विविध धार्मिक आणि सामाजिक कार्यक्रमांचे आयोजन करण्यात आले. या उत्सवाच्या निमित्ताने गणपती बाप्पाच्या चरणी ५६ भोगांचा नैवेद्य अर्पण करण्यात आला. विशेषतः विविध पंच पक्वान्न आणि फळांनी बाप्पासमोर आकर्षक आरास सजवण्यात आली होती, ज्यामुळे भक्तांच्या मनाला आनंद झाला.

श्रीमंत भाऊसाहेब रंगारी ट्रस्टने यंदाही सामाजिक बांधिलकी जपत, नैवेद्याच्या सर्व पदार्थांचे सामाजिक संस्थांना वाटप करण्याचा निर्णय घेतला आहे. यामध्ये दत्तवाडी येथील देवतारू आश्रम आणि मुळशी खोऱ्यातील कातकरी वस्तीतील ३०० विद्यार्थ्यांना शिक्षण देणारी संस्था आणि दररोज ९० मुलांना जेवण पुरविणारी पौड येथील ‘डोनेट ऐड’ संस्था यांचा समावेश आहे. याशिवाय भाजे येथील बालग्राम केंद्रालाही हे नैवेद्यचे पदार्थ देण्यात येणार आहेत.

त्रिपुरारी पौर्णिमेच्या दिवशी श्रीमंत भाऊसाहेब रंगारी गणपती मंदिरात दिव्यांच्या सजावटीने संपूर्ण मंदिर उजळून निघाले होते. काचेच्या ग्लासमधील दिव्यांच्या झगमगाटात मंदिराची शोभा द्विगुणित झाली. फुलांच्या सुंदर सजावटीमुळे मंदिराच्या सौंदर्यात भर पडली. या प्रसंगी भाविकांची मोठी गर्दी जमली होती आणि सर्वांनी बाप्पाचे दर्शन घेतले. यावेळी ट्रस्टचे सर्व पदाधिकारीही उपस्थित होते. त्यांनी उत्सवाचे आयोजन उत्तम पद्धतीने केले होते. यामुळे गणेशभक्तांना एक सकारात्मक आणि आनंददायी अनुभव मिळाला. 

श्रीमंत भाऊसाहेब रंगारी गणपती हे केवळ धार्मिक उत्सव साजरा करणारे केंद्रच नाही, तर सामाजिक जाणिवा जपणारी एक आदर्श संस्था म्हणूनही ओळखले जाते.